هيءَ ڌرتي رت اوڇارن سان اڄ ٽامي وانگر ٽڙڪي ٿي
۽ ڀوريءَ ڀوري ڀونءِ مٿان ڪا باهه ڀنڀر ڪا ڀڙڪي ٿي
ٿو ڪک ۾ ڪپ ڪچراٽ ڪري ڪا گولي هڏ سان ٺڙڪي ٿي
هي ريٽي رت جا رنگ ڏسي اڄ غير جي ڇاتي ڌڙڪي ٿي
هن لال لهوءَ سان او لالڻ ڪي ڀاڳ ڀلارا بڻجي ويا
ٽوڙهيءَ وارن جي دم سان ڪي وارا به نيارا بڻجي ويا

هيءُ ملڪ نه جنرل جي پيءُ جو، هيءَ مٽي منهنجي تنهنجي آ
”ٿو ملڪ کپي ماڻهو نه کپن“ هيءَ ڳالهه او ٽڪا! اهنجي آ
هڪ لاش لتاڙي رهڻو ٿئي هونئن سنڌ نه سستي سهنجي آ
بندوق ڏسيندي آرڻ ۾ هيءَ ڌرتي آخر ڪنهنجي آ
رت ساڻ ته پِڙَ وهنجارڻ لاءِ سينا به ڦوهارا بڻجي ويا
ير! ٽوڙهي وارن جي دم سان وارا به نيارا بڻجي ويا.

چئه ڪنهن جو ناهي جيءُ جھريو هي ڪارو قتلِ عام ڏسي
هر ماءُ رنو ٿئي پار ڪڍي سر بندوقن جي لام ڏسي
هر ڀيڻ جي دل بيروت بڻي هيءٌ وک وک تي ويٽنام ڏسي
او پير وڏا! او مير وڏا! پر تنهنجي هٿ ۾ جام ڏسي
هر سنڌيءَ جا ڏند تڻجي پيا ٽانڊا تارا بڻجي ويا

جنهن حق کسيا هت ماڻهن جا، سو ڊاڪو آهه لٽيرو آ
سو حج ڪري، قرآن پڙهي پر قاتل سوئر پيرو آ
غازي يا مجاهد ڀل سڏجي، بي بڻيادو بي ديرو آ
ڪهڙا به رکائي نانءُ اچي، سو ڍيرائي آ ڍيرو آ
هر سنڌي جا ڏند تڻجي ويا ۽ ٽانڊا تارا بڻجي ويا
ير! ٽوڙهيءَ وارن جي دم سان وارا به نيارا بڻجي ويا.

هي هيڏا پيا ٿا ڪيس ٿين پر تو کي ڪو ويچار نه آ
هي وسيل ويڙها اجڙي ويا پر تو تي ڄڻ ته ميار نه آ
جي هاڻ به ڪجھه نه ويچاريئي ته پوءِ تو جھڙو غدار نه آ
ڇا تو کي چئجي هڪ جيڏا غدار جھڙي ٻي گار نه آ
غدار ته سورهيه قوم جي لاءِ ــ گند جا کارا بڻجي ويا
ير! ٽوڙهي جي دم سان وارا به نيارا بڻجي ويا

هي ڌاڙيلن جا ساٿاري، هو هيروئن جا واپاري
انصاف جا ٺيڪيدار ٿيا، بينگال جي خون جا کيڏاري
هت حق گھرندڙ لئه گوليون ۽ چورن جي هت چوياري
تون ڪيستائين ڀاءَ ڀلا! ان پرمارن جو پوڄاري
گس ٽريا پنهنجا غيرن کان ۽ چٽڙا چارا بڻجي ويا
ير! ٽوڙهي وارن جي دم سان وارا به نيارا بڻجي ويا.

اٿ سانباهو ڪر مقتل ڏي ٿو ساري رت شهيدن جو
هو ڪارونجھر جي ڪور مٿان، آ اڀريو سج اميدن جو
هن ڌرتيءَ تان ڌوڦار ڪبو ها! پاڙو هاڻ پليدن جو
اولاد لڏائي ڇڏڻو آ بي لڄ يارن بي ديدن جو
هن جوءِ جا وارث جاڳي پيا ۽ ديس دلارا بڻجي ويا
ير! ٽوڙهي وارن جي دم سان وارا به نيارا بڻجي ويا.
ـــــــــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــــــــــــ